食記
自從上次係佛山食過呢間大排檔之後，一直念念不忘佢哋既魚生。咁啱今次清遠之旅，由深圳自駕去清遠，可以順路去食個靚午餐。本來諗住去返佛山果間，但原來番禺都有分店，咁番禺近啲，所以今次就試吓番禺分店！
呢間大排檔主打平價海鮮，有刺身、清蒸或者避風塘都有，招牌係日式刺身、順德魚生、蒸生蠔、避風塘炒蝦同埋炒蟶子等等～
另外主食方面，佢哋既招牌係蒸/炸雲吞同埋蒸竹腸，因為上次係佛山分店試過蒸雲吞，覺得一般，所以今次無叫。
無論係海鮮定主食，不得一讚既係佢哋所有食材都非常之新鮮，魚生係即日捉即日起肉，雲吞都係現場包，新鮮度100分！
餐廳既裝修係老牌粵式大排檔風格，餐具有膠包住，地下乾淨，衛生度幾好。
餐廳內牆上面有塊牌寫哂各類海鮮既價錢，或者掃碼點餐時都會睇到～
先上桌既係油甘魚刺身 ¥58，有 8 件，餐牌上話係厚切，我以為係起碼 1 cm 一片，但實際應該得 0.4 mm，但依然有咬口，啖啖肉既感覺，最緊要係，真係超級新鮮！係香港食唔到咁新鮮又咁平！
第二道菜，金鵰魚刺身(一條) ¥148，順德做法，真係切得好薄，調料有花生油、鹽、薑絲、檸檬草、芫茜、紫洋蔥、榨菜、京蔥絲，另外亦有豉油同芥辣，順德食法定日式食法都得！
第三道菜，招牌魚蓉羮 ¥38，裡面好多新鮮既魚肉碎，應該係鯇魚肉，加上蛋花同芫茜🌿，好好飲，上桌時非常熱，份量較多，兩個人都飲唔哂～
第四道菜，椒鹽蟶子 ¥45，蟶子比較少用椒鹽整，所以試下，味道唔錯嘅，不過如果要食蟶子嘅鮮味，可能蒸或炒好啲～
最後，呢杯手打檸檬茶係唔洗錢嘅，因為係「大眾點評」打卡收藏可以免費拎一杯～
附上是日午餐消費明細﹕
餐廳資料
店名：嘉升大排檔
地址：廣州番禺區石碁鎮市蓮路石碁村20號
營業時間：中午 11:00～14:00/ 晚上 16:40～21:20
分店地址：
番禺總店嘉升大排檔
佛山西樵山嘉升大排檔
